1 ივნისი - ბავშვთა დაცვის საერთაშორისო დღე

სიმონ ჯანაშიას სახელობის საქართველოს მუზეუმში ბავშვებისა და მათი თანმხლები პირებისათვის ვიზიტი და ტურებზე დასწრება თავისუფალია

ს. ჯანაშიას სახელობის მუზეუმი გთავაზობთ შემდეგ პროგრამებს:

12:00 ბუნების მრავალფეროვნება

პროგრამის აღწერა: პროგრამის მონაწილეებს საშუალება ეძლევათ დაათვალიერონ  ს. ჯანაშიას სახელობის საქართველოს მუზეუმში მიმდინარე გამოფენა ,,კავკასიის ბიომრავალფეროვნება".

თანამედროვე სამუზეუმო ტექნოლოგიების გამოყენებით შექმნილ გამოფენაზე წარმოდგენილია კავკასიის რეგიონის ბიომრავალფეროვნება: გეოლოგიური, ბოტანიკური და ზოოლოგიური კოლექციები -მინერალები, ქანები, ნამარხი უხერხემლო ცხოველები, ფაუნა, უმაღლესი და უმდაბლესი მცენარეების საჰერბარიუმო ნიმუშები, მოლუსკები, მწერები, თევზები, ამფიბიები, ქვეწარმავლები, ფრინველები და ძუძუმწოვრები, ყველაფერი ის, რაც სრულყოფილად ასახავს საქართველოს და, ზოგადად, კავკასიის რეგიონის ფლორისა და ფაუნის ევოლუციურ განვითარებას.

12:00 არქეოლოგიური საგანძური

14:00 არქეოლოგიური საგანძური

ექსპოზიციაზე გაეცნობით  საქართველოში არქეოლოგიური გათხრების შედეგად აღმოჩენილ ოქრომჭედლობის ნიმუშებს, რომლებიც წარმოაჩენს ქართული კულტურის განვითარების გზას ძვ.წ.აღ. III ათასწლეულიდან ახ.წ.აღ. IV საუკუნემდე. 

დამთვალიერებელს საშუალება ეძლევა გამოფენაზე იხილოს ქართული ოქრომჭედლობის ნიმუშები: ოქროსა და ვერცხლის სამკაულები - დიადემები, თავსამკაულები, სასაფეთქლეები, საყურეები, სამაჯურები, ძვირფასი თვლებით შემკული ყელსაბამები და ბეჭდები, აგრეთვე ოქროს, ვერცხლისა და მინის ჭურჭელი, მცირე ზომის ქანდაკებები, სარიტუალო დანიშნულების ნივთები, იარაღი და სხვა. 

________________________________________________________________________________

15:00  საგანმანათლებლო- შემეცნებითი პროგრამა - „აღმოაჩინე ცხოველთა გამოსახულებები ოქროს ფონდში " (10-14 წლის ასაკისათვის )

პროგრამის ავტორი: ცისია კილაძე

პროგრამის ხანგრძლივობა: 40 წთ

აღმოაჩინე ცხოველთა გამოსახულებები ს. ჯანაშიას სახელობის მუზეუმის ოქროს ფონდში. ცხოველთა გამოსახულებები შესაძლოა სრულიად სხვადასხვანაირი იყოს - მცირე ქანდაკებები, რელიეფები, სამკაული ან სარტყელზე გამოსახული ცხოველები, მომცრო ან დიდი ზომის ფიგურები, ბრინჯაოს, ვერცხლის და ოქროს მასალით შესრულებული.  ცხოველები ძველი ოსტატების შთაგონების წყაროა. ისინი მნიშვნელოვან როლს ასრულებდნენ იმდროინდელი ადამიანის რწმენა-წარმოდგენების სფეროში და თითქმის ყოველთვის გარკვეული სიმბოლური და რელიგიური დანიშნულება ჰქონდათ . ჩვეულებრივი ცხოველების გარდა აქ შეგხვდებათ ფანტასმაგორიული არსებები, რომლებიც სხვადასხვა ცხოველების ნიშან-თვისება მოიცავენ და აერთიანებენ თავის თავში. მაგალითად, ადამიანის ფიგურები, რომელთაც ცხოველის თავი აქვთ. ზოგჯერ ისინი ამ ნივთებზე უცნაურ არსებებად გვევლინებიან, ზოგჯერ კი ყველსათვის ნაცნობი ცხოველები არიან.

 ____________________________________________________________________________

14:00  1 ივნისი - ბავშვთა დაცვის საერთაშორისო დღე

ექსპოზიციაზე წარმოდგენილია საქართველოს ქვის ხანა (1.77 მლნ. წ. - 8 ათასი წ.) და მსოფლიოს სხვადასხვა კუთხეში აღმოჩენილი ანთროპოლოგიური მასალა, რომელიც ადამიანის ევოლუციის დროში განვითარებას ასახავს.