ფოტოგამოფენა ,,ქართული მელანქოლიის ანატომია”

14 ოქტომბ. 2013 – 14 ნოემბერი 2013

ეროვნული გალერეა

2013 წლის 14 ოქტომბერს 18:00 საათზე საქართველოს ეროვნული მუზეუმის დიმიტრი შევარდნაძის სახელობის ეროვნული გალერეა წარმოგიდგენთ ლადო ფოჩხუას პერსონალურ ფოტოგამოფენას ,,ქართული მელანქოლიის ანატომია". აღნიშნული გამოფენა თანამედროვე ხელოვნების ფესტივალის ,,არტისტერიუმი 2013"  ფარგლებში გაიმართება.

ლადო ფოჩხუა დაიბადა სოხუმში. 1993 წელს ქვეყანაში განვითარებული მოვლენების გამო იგი იძულებული გახდა საცხოვრებლად თბილისში გადმოსულიყო. პროფესიული განათლება მან თბილისის სამხატვრო აკადემიაში მიიღო, 2004 წლიდან კი იგი აშშ-ში ცხოვრობს და მოღვაწეობს. სისტემატიურად იღებს მონაწილეობას სხვადასხვა ჯგუფურ გამოფენებში, პერსონალურ სტუდიაში ასწავლის ხატვას. აღსანიშნავია, რომ მის მოსწავლეთა შორის მრავლადაა  აშშ-ში მცხოვრები ქართველი. ლადო ფოჩხუა არის აგრეთვე კოლუმბიის უნივერსიტეტის მიწვეული ლექტორი, სადაც ქართული ხელოვნების შესახებ კითხულობს ლექციებს.

ავტორის შემოქმედება მისი წარსულით არის შთაგონებული.  გამოფენაზე წარმოდგენილ ნამუშევრებს ავტორი ასე აღწერს: ,,ამ პროექტის არსებობას დიდწილად ვუმადლი ჩემს მეხსიერებას და ვითარებებს, რომელთა შეცვლაც მე არ შემეძლო. ამ გამოფენაზე გამოტანილი ფოტოსურათები ჩემი გზის ეტაპებია, რომელიც ლტოლვილის ცხოვრებიდან ადამიანურ ცხოვრებამდე გავიარე."

ავტორის ბოლო დროინდელ უმნიშვნელოვანეს გამოფენებს შორის აღსანიშნავია მისი პერსონალური გამოფენა ბუდაპეშტში, პრაღის ბიენალე და ლაიბციგში გამართული ჯგუფური გამოფენა. ნოემბერში, არტისტერიუმის დასრულების შემდგომ, ავტორი ნიუ-იორკის "Brooklyn Box" გალერეაში  პერსონალურ გამოფენას გამართავს.

გამოფენა ,,ქართული მელანქოლიის ანატომია" ეროვნულ გალერეაში 14 ნოემბრამდე გაგრძელდება.

მისამართი: დიმიტრი შევარდნაძის სახელობის ეროვნული გალერეა, შოთა რუსთაველის გამზირი 11.