გამოფენა „გახსნილი სამყარო”

11 ივლისი 2016
Share

2016 წლის 19 ივლისს 18:00 საათზე საქართველოს ეროვნული მუზეუმის შალვა ამირანაშვილის სახელობის ხელოვნების მუზეუმში გიწვევთ ლუქსემბურგში მოღვაწე ქართველი არტისტის ირინა გაბიანის პერსონალური გამოფენის გახსნაზე - „გახსნილი სამყარო".

ექსპოზიციაზე წარმოდგენილი იქნება ირინა გაბიანის მიერ სხვადასხვა მედიაში შესრულებული ნამუშევრები, რომლებიც მხატვარმა სპეციალურად ამ გამოფენისთვის შექმნა.  მისი  ინსპირაცია არის მიკრო და მაკრო სამყაროები თავისი კომპლექსურობითა და მრავალფეროვნებით. არტისტის აზრით, კაცობრიობა იმ უნიკალური სისტემის ნაწილია, რომელიც  უამრავი ურთიერთგადაჯაჭვული მოვლენისგან შედგება. ირინა გაბიანი ცდილობს თავის ნამუშევრებში გადმოსცეს მსგავსება უსასრულოდ დიდ სხეულებსა და უსასრულოდ მცირე ნაწილაკებს შორის. გამოფენაზე  წარმოდგენილი ნამუშევრები კონცეპტუალურად მთლიანად ამ თემას შეეხება.

ირინა გაბიანი არის ვიზუალური არტისტი, რომელიც ცხოვრობს და მოღვაწეობს ლუქსემბურგში.  მუშაობს გრაფიკაში, ქმნის როგორც ორგანზომილებიან ნამუშევრებს, ასევე ინსტალაციებს, ქანდაკებას, ვიდეოარტს, პერფორმანსს და ფოტოს.

არტისტი ინტენსიურად მართავს გამოფენებს, ჩართულია საერთაშორისო ვიდეო არტფესტივალებში, არტფორუმებსა და პრესტიჟულ საერთაშორისო პროექტებში. ავტორს მონაწილეობა აქვს მიღებული: ვენეციის 54-ე საერთაშორისო ბიენალე Arsenale (2011); იტალიის პავილიონი; ტორინოს ფესტივალი Video Dia Loghi; ედნბურგის საერთაშორისო ფესტივალი; ტორონტოს საერთაშორისო ფესტივალი Toronto Urban Film Festival (2013); კიოლნის ვიდეო ფესტივალი Cologne OFF; პეკინის Contemporary Art Fair;  რომის არტფესტივალი  Sguardi Sonor (2012).  ირინა გაბიანს მიღებული აქვს მრავალი საერთაშორისო ჯილდო.

ავტორის ნამუშევრებს შეგიძლიათ გაეცნოთ: http://www.irinagabiani.com/

გამოფენა  "გახსნილი სამყარო" 2016 წლის 30 ივლისამდე გაგრძელდება.

მისამართი: შალვა ამირანაშვილის სახელობის ხელოვნების მუზეუმი, ლადო გუდიაშვილის ქუჩა 1.